ހއ. އަތޮޅު ރަންތާޖު ޤުރުއާން މުބާރާތުގައި ބައިވެރިވުމަށް ހުޅުވައިލައިފިއެވެ. މި މުބާރާތުގައި ބައިވެރިވުމުގެ ފުރުޞަތު ކެލާ ކައުންސިލް އިދާރާއިން ހުޅުވާލީ ސަރުކާރުގެ ގެޒެޓް މެދުވެރިކޮށް ކުރެއްވި އެ އިދާރާގެ ނަންބަރު: 249-B/249/2025/74 އިޢުލާނުންނެވެ.
ހއ.އަތޮޅު ކައުންސިލް އިދާރާއިން އިންތިޒާމްކޮށްގެން އަތޮޅުގެ އެކި ރަށްރަށުގައި ބާއްވަމުން ރަންތާޖު ޤުރުއާން މުބާރާތް މި އަހަރު ބޭއްވުމަށް ހަމަޖެހިފައި ވަނީ ކެލާގައެވެ. ސަބަބަކީ މި އަހަރުގެ މުބާރާތް ބޭއްވުމަށް ހުޅުވާލި ފުރުޞަތުގެ ދަށުން ޕްރޮޕޯސަލް ހުށަހަޅައިގެން އެ ފުރުސަތު ހޯދާފައި ވަނީ ކެލައިން ކަމަށްވުމެވެ. މި އަހަރުގެ މުބާރާތް ބޭއްވުމަށް ހަމަޖެހިފައި ވަނީ އޮކްޓޯބަރު މަހުގެ 24 އިން 25 އަށެވެ.
ކެލާ ކައުންސިލް އިދާރާއިން ކުރައްވާފައިވާ އިޢުލާނުގައި ދަންނަވާފައިވާ ގޮތުން ނަމަ މި މުބާރާތުގެ އޮޑިޝަން މި ހިނގާ އޯގަސްޓް މަހުގެ 30 ވަނަ ދުވަހު ކެލާގައި އޮންނާނެއެވެ. އޮޑިޝަންގައި ބައިވެރިވާން ބޭނުންވާ ފަރާތްތަކުން މި ހިނގާ އޯގަސްޓް މަހުގެ 21ގެ ކުރިން ފޯމު ފުރިހަމަކޮށް އެ އިދާރާއަށް ހުށަހަޅަން ޖެހެއެވެ.
ހއ.ގެ ރަށްތަކަށް ހުޅުވާލައިގެން ބާއްވާ މި މުބާރާތުގައި އެ ރަށެއް ތަމްސީލް ކުރުމުގެ ފުރުޞަތު ދިނުމަށް ހަމަޖެހިފައި ވަނީ މި އަހަރުގެ ޖުލައި މަހުގެ 8 ވަނަ ދުވަހުގެ ކުރިން އެ ރަށެއްގެ ރައްވެއްސެއްގެ ގޮތުގައި ރަޖިސްޓަރީވެފައިވާ ފަރާތްތަކަށެވެ.
