މި ދިޔަ އަހަރު އޭ ލެވެލް ނިންމި ދަރިވަރުންގެ ތެރެއިން ހައި އެޗީވަރސް ސްކޮލަރޝިޕް ލިބުނު 117 ދަރިވަރުންގެ ތެރޭގައި ކެލާގެ 3 ދަރިވަރަކު ހިމެނިއްޖެއެވެ. މި ދިޔަ އަހަރު އޭ ލެވެލް އިމްތިޚާނު ނިންމި ދަރިވަރުންގެ ތެރޭން ސްކޮލަރޝިޕް ލިބުނު ދަރިވަރުންނަށް ލިޔުން ޙަވާލުކުރުމަށް ރޭ ހުރަވީ ސުކޫލުގައި ބޭއްވި ޖަލްސާގައި މި 3 ދަރިވަރުންނަށް ހައި އެޗީވަރސް ސްކޮލަރޝިޕް ލިބުނުކަމުގެ ލިޔުން ވަނީ ޙަވާލުކޮށްފައެވެ.
ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ޝަރަވެރިކޮށްދެއްވި މި ޖަލްސާގައި ހައި އެޗީވަރސް ސްކޮލަރޝިޕް ލިބުނުކަމުގެ ލިޔުން ޙަވާލުކުރި ކެލާގެ 3 ވަރުންނަކީ، ސީ.އެޗް.އެސް.ސީން ތަޢުލީމު ޙާޞިލްކުރި ހއ. ކެލާ ތަރިވިދާގޭ ޢާއިޝަތު އަލީޝާއާއި، އަޙްމަދިއްޔާ އިންޓަރނޭޝަނަލް ސްކޫލް ނިންމި ހއ. ކެލާ މަސްކާށިގޭ އާދަމް ނާއިޝް ނަސީމާއި އަދި ހއ. ކެލާ އައްސޭރި ޢާއިޝަތު ޔާސްމީނެވެ.
މި ޖަލްސާގައި މި ދިޔަ އަހަރު އޭ ލެވެލް އިމްތިޚާނުން 1 ވަނަ ހޯދި ދަރިވަރުންނަށް ރައީސުލްޖުމްހޫރިއްޔާ ދެއްވާ ޚާއްޞަ ސްކޮލަރޝިޕް 19 ދަރިވަރަކަށް ވަނީ ދެއްވާފައެވެ. އެއީ ވިލާ ހައި އިންޓަނޭޝަނަލް ސްކޫލުގެ 6 ދަރިވަރަކާއި، ސެންޓަރ ފޯ ހަޔަރ ސެކަންޑްރީ އެޑިޔުކޭޝަން (ސީއެޗްއެސްއީ)ގެ 6 ދަރިވަރަކާއި، އަޙްމަދިއްޔާ އިންޓަނޭޝަނަލް ސްކޫލުގެ 4 ދަރިވަރަކާއި، އަދި ޢަރަބިއްޔާ ސްކޫލުގެ 3 ދަރިވަރެކެވެ.
ރޭ ހުރަވީ ސުކޫލުގައި އޮތް މި ޖަލްސާ، ޝަރަފުވެރިކޮށްދެއްވާ ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ދެއްކެވި ވާހަކަފުޅުގައި ކަންކަމާ ކެރިގެން ކުރިމަތިލައިގެން ހިތްވަރާއެކު ކުރިއަށް ދިއުމަށް އިލްތިމާސްކުރެއްވިއެވެ. އަދި ދިރިއުޅުން ކުރިއަށްދާ އިރު އުފާވެރިކަން އަބަދު ކުރިމަތި ނުވާނެ ކަމަށާ، ގޮންޖެހުންތައް ދިމާވެ މާޔޫސްކަން ކުރިމަތިވާ ފަހަރު ވެސް އަންނާނެކަމަށް ވިދާޅުވެ، އެ ފަދަ ޙާލަތްތަކުގައި ހަށިފޮޅައިލާ ތެދުވެ ކުރިޔަށް ދިއުމަށް ރައީސުލްޖުމްހޫރިއްޔާ ގޮވައިލެއްވިއެވެ.
ހައި އެޗީވަރސް ސްކޮލަރޝިޕް ލިބުނު ކެލާގެ 3 ދަރިވަރުންނަށް ތިލައުތުރުން، ހޫނު މަރުޙަބާއެއް ކިޔަމެވެ. ތަޢުލީމް ޙާޞިލްކޮށް އެނބުރި އައިސް، މި ރާއްޖެއާ ފަޚުރުވެރި ވަޠަނަށް ޚިދުމަތްކޮށްދޭނެ ކަމަށް ތިލައުތުރުން އުންމީދުކުރަމެވެ.
