ކެލާ ދާއިރާގެ ތިން ރަށަށް ޚާއްޞަކޮށްގެން ބާއްވާ ”އެމްޕީ ޝަރީ ކަޕް 2025” ރަސްމީކޮށް އިފްތިތާޙްކޮށްފިއެވެ. ”އެމްޕީ ޝަރީ ކަޕް 2025” ރަސްމީކޮށް އިފްތިތާޙްކޮށްދެއްވީ މިރޭ ކަމަނަ މާލަމްގައި ބޭއްވި ޚާއްޞަ ރަސްމިއްޔާތެއްގައި ރައީސް އޮފީހުގެ މިނިސްޓަރ އަލްފާޟިލް ޢަލީ އާރިފުއެވެ.
ރަސްމީކޮށް މިރޭ އިފްތިތާޙްކުރެވުނު ”އެމްޕީ ޝަރީ ކަޕް 2025”ގައި ހޭންޑް ބޯޅައާއި، ފުޓްސަލް މުބާރާތެއް ހިމަނުއްވާފައި ވެއެވެ. މިރޭ ބޭއްވި މި ރަސްމިއްޔާތުގައި މުބާރާތުގެ ލޯގޯއާއި، ލަވަ ވެސް ލޯންޗްކޮށްފައެވެ.
ރައީސް އޮފީހުގެ މިނިސްޓަރ އަލްފާޟިލް ޢަލީ ޢާރިފު ދެއްކެވި ވާހަކަފުޅުގައި މި ސަރުކާރުން ދުންފަތާއި ދެކޮޅަށް ގެންގުޅުއްވާ ވިސްނުންފުޅާއި، ކުޅިވަރާއި، ޒުވާނުންނާ ގުޅުން ހުރި ސިޔާސަތުތަކުގެ މައްޗަށް އަލިއަޅުވައިލެއްވެވިއެވެ.
މި ރަސްމިއްޔާތުގައި ކެލާ ދާއިރާގެ ޢިއްޒަތްތެރި މެންބަރ ޢަބްދުﷲ ޝަރީފު ދެއްކެވި ވާހަކަފުޅުގައި ދާއިރާގެ ތިން ރަށަށް ޚާއްޞަކޮށްގެން މުބާރާތެއް ބޭއްވުމުގެ އެންމެ ބޮޑު މަޤުޞަދަކީ އަދުގެ ސަރުކާރުން ދުންފަތާދުރު، ދުޅަހެޔޮ ޒުވާންޖީލެއް ބިނާކުރުމަށް ގެންގުޅުއްވާ ސިޔާސަތުގެ ތެރެއިން ތިން ރަށުގެ ދެ ޖިންސުގެ ޒުވާނުންނަށް ވާދެވެރި ކުޅިވަރުގެ މުބާއްރާތްތަކެއް ބާއްވައިދީ ކުޅިވަރުގެ ހުނަރުވެރިކަން ތަރައްޤީ ކޮއްދެއްވުން ކަމަށް ވިދާޅުވިއެވެ.
ޗެންޕިއަން ޓީމަށް ބައިލައްކަ ރުފިޔާ ލިބޭ މި މުބާރާތް ބޭއްވުމަށް ހަމަޖެހިފައިވަނީ އަންނަ ޖުލައި މަހުގެ 26 ވަނަ ދުވަހު ހއ. ފިއްލަދޫގައެވެ. ހޭންޑް ބޯލް މެޗްތައް ހަވީރު ކުޅުމަށް ހަމަޖައްސައިފައިވާ އިރު ފުޓްސެލް މެޗްތައް ކުޅުމަށް ހަމަޖެހިފައި ވަނީ ރޭގަނޑެވެ.
މި މުބާރާތުގެ މެއިންސްޕަންސަރއަކީ ސިންގަރ ކުންފުންޏެވެ. މީޑިއަރ ޕާރޓުނާއަކީ، އެމް. އެމް ޓީވީއެވެ. މި ޙަފްލާގައި ރައީސް އޮފީހުގެ ބައެއް މިނިސްޓަރުންނާއި، ސްޕޯރޓްސް މިނިސްޓްރީގެ އިސްވެރިންނާއި، ކެލާ ދާއިރާގެ ޒުވާނުންނާއި އަދި ކުޅިވަރު އާއިލާގެ ގިނަ ފަރާތްތަކެއް ބައިވެރިވިއެވެ.
