ރައްޔިތުންނަށް ފުންމާ ސަންގު

އަންޒަމާނުން ސުރެ ރައްޔިތުންނަށް ފުންމާ ސަންގަކީ ރައްޔިތުން ނުހަނު ސަމާލުކަން ދިން ސަންގެކެވެ. އަޑުއިވުނު ކޮންމެ ރައްޔިތަކު އޭގެ އަޑަށް ރަށްމެދަށް އެއްތަންކުރުވި ބާރެކެވެ. ނަމަވެސް މިއަދު އެ ސަންގުގެ އަޑު ކިތަންމެ ގަދަޔަސް ސަންގުގެ އަޑުއިވޭ ކަންފަތެއް ނެތެވެ.
މިވީ ކިހިނެއް ހެއްޔެވެ. އަދިވެސް މިއީ އެ މަޙަލްދީބެވެ. ކުދި ފުށި ރަށްތަކެވެ. ދިރިއުޅެނީ މައްދިވެހިންނެވެ. އިބްނުބަޠޫޠާއާއި، ޕީރާޑްމެން ތަޢުރީފު ކުރެއްވި ނަސްލުގެ ދިވެހިންނެވެ. ބޯމަތީގައި ވިހުރެނީ އެ ފެހި، ރަތް އަދި ހުދުގެ ދިދައެވެ. އެ ދިދާގެ ވައްތަރަކަށް އަދި ކުލައަކަށް އައި ބަދަލެއް ނެތެވެ. ބަދަލުވީ ޢުމުރެވެ. ޖީލެވެ. ބަދަލުވީ އެއްޗެއްސަށް ވުރެ ގިނައީ ބަދަލު ނާންނަ އެއްޗެއްސާއި ކަންކަމެވެ.
ދަންނަވަންތޯއެވެ. ބަދަލުއައީ މި ފަސްގަނޑުގައި ދިރިއުޅޭ ރައްޔިތުންގެ އުޅުމަށެވެ. އަޚްލާޤަށެވެ. މިޒާޖަށެވެ. ތަނަވަސް ކަމަށެވެ. ތަރައްޤީއޭ މި ކިޔައި ކަންކަމަށެވެ. ހިޔުމަން ރައިޓުސްގެ ނަމުގައި ހުނޅަގުން ފަތުރަމުންދާ ކަންކަމަށެވެ.
ވެރިކަމުގެ ބާރަކީ ބަޔަކުދެއްވާ ބާރެއް ނޫނެވެ. ބަޔަކު ދޭން ހުއްޓަސް އެ ކަން އެ ގޮތަށް މެދުވެރި ވަނީ ވަކި ބަޔަކަށެވެ. ވެރީންނަށް ކިޔަމަންތެރިވުމަށް މަތިވެރި ﷲގެ ދީނުގައި ވެސް ބާރުއަޅުއްވައިފައި ވެއެވެ. އެއަކީ އިންސާނުން ހަދާ އުޞޫލަކާއި، ޤަވާޢިދަކާއި، ޤާނޫނަކުން ބަދަލުކުރެވޭނެ ކަމެއް ނޫނެވެ. އެއީ އިލާޙީ ޤާނޫނުން ލިއްބައިދީފައި އޮތް ބާރެކެވެ.
ކުރިން މި ދެންނެވި ސައްގުގެ އަޑު ރައްޔިތުންނަށް ނީވުމުން ރައްޔިތުންނަށް ލިބޭ ގެއްލުންތައް ކުޑަވެދާނެ ކަމަށް ހީވާ ނަމަ އެއީ ކުށް ހީއެކެވެ. އޭގެ ސަބަބުން ރައްޔިތުންގެ ބާރު ރައްޔިތުން އަމިއްލައަށް އެބަ ދޫކޮށް ލެވެއެވެ. އެ ބާރު ކަނޑުވައިލެވެއެވެ. އާޚިރުގައި ގިނަ ފަހަރު ގެއްލުން ލިބެނީ ޚުދު ރައްޔިތުންނަށެވެ.
ލާމަރުކަޒީ ނިޒާމުން ވެރިކަން ހިންގުމަކީ ރައްުޔިތުންގެ ބާރު ރައްޔިތުންނަށް، ދައުލަތުން ދިނުމެވެ. މަރުކަޒީ ބާރުތައް ރައްޔިތުންނަށް ދޫކޮށްލުމެވެ. ރައްޔިތުން ހޮވި ބަޔަކު ރައްޔިތުންގެ ބަހާއެކު ވެރިކަން ކުރުމެވެ. ފަހަރެއްގައި ވެސް އެ ބަޔަކު ބޭނުންވާ ގޮތަކަށް ފުށްގަނޑެއްހެން މޮޑެ، ފޮތިފޮތިކުރަންދޭ ފާހަގައެއް ނޫނެވެ.
މިއަދުވެސް ރައްޔިތުންނަށް އަޑުއިވެން ޖެހެނީ އެ ސަންގެވެ. ސަންގު ގޮއްވާ ގޮތާއި، ފުމޭ ގޮތް ތަފާތު ވެދާނެއެވެ. ވިސްނަންވީ ކޮންމެ ކަމަކަށް ވެރިން ގޮވައިލެއްވިއަސް އެ ގޮވާލުމަށް އިޖާބަ ދިނުމަށެވެ. ވެރިން ދައްކަވައި ވާހަކަތައް އަޑުއެހުމަށެވެ. އެ ވާހަކަތަކުގެ ބާރު ގަދަކޮށް ބަލިކޮށް ހެދުމުގެ މަސްއޫލިއްޔަތު ރައްޔިތުންނަށް މިއަދުވެސް އެބަ އޮތެވެ. ރައްޔިތުންގެ ބަހަކީ އެންމެ ފަހު ބަހެވެ.