ކެލާ، ފަޅުގައި ދެ ރިސޯޓް ތަރައްޤީކޮށް ހިންގާނެ ފަރާތެއް ހޯދުމަށް ޓޫރިޒަމް މިނިސްޓްރީން ޢިއުލާންކޮށް، ބީލަން ހުޅުވައިލައިފިއެވެ.
ކެލާ ފަޅުގައި ރިސޯޓް އެޅުމަށް ޓަކައި ކެލާގެ އިޚްތިޞާޞަށް ރައީސުލްޖުމްހޫރިއްޔާ ބަދަލު ގެންނެވީ ހުސްވި މާރިޗު މަހުގެ 29 ވަނަ ދުވަހެވެ. އޭގެ 3 ދުވަސް ފަހުން މި ވަނީ ކެލާގެ ފަޅުގައި ދެ ރިސޯޓު ތަރައްޤީކުރުމަށް ބީލަން ހުޅުވައިލައިފައެވެ.
އެ ގޮތުން މި ވަނީ ކެލާގެ ފަޅުތެރެއިން 156.2 ހެކްޓަރުގެ ސަރަހައްދަކާއި، 169.3 ހެކްޓަރުގެ ސަރަހައްދެއް ކަނޑައަޅައި، ބީލަމުގެ އުޞޫލުން ޓޫރިސްޓް ރިސޯޓް ތަރައްޤީކޮށް ހިންގާނެ ފަރާތެއް ހޯދުމަށް އިޢުލާންކޮށްފައެވެ.
މި ބީލަންތަކަށް ޝައުޤުވެރިވެލައްވާ ފަރާތްތަކުން އޭޕްރީލު މަހުގެ 15ވާ އަންގާރަ ދުވަސް އަދި އަންނަ މޭ މަހުގެ 06ވާ އަންގާރަ ދުވަހު ވަރޗުއަލްކޮށް ބާއްވާ މަޢުލޫމާތު ސާފުކުރުމުގެ ބައްދަލުވުންތަކުގައި ބައިވެރިވުމުގެ ފުރުޞަތު ވަނީ ހުޅުވައިލައިފައެވެ. ބީލަން ހުށަހެޅުމުގެ ސުންގަޑީގެ ގޮތުގައި ކަނޑައަޅާފައިވަނީ ޖޫން މަހުގެ 5ވަނަ ދުވަހުގެ ނިޔަލަށެވެ.
މަޢުލޫމާތު ސާފުކުރުމުގެ ބައްދަލުވުމުގައި ބައިވެރިވުމަށް ޓަކައި މިމަހުގެ 14ވާ ހޯމަ ދުވަހާއި އަންނަ މަހުގެ 05ވާ ހޯމަ ދުވަހުގެ 12:00ގެ ކުރިން ފަތުރުވެރިކަމާ ބެހޭ ވުޒާރާގެ އީމެއިލަށް މަޢުލޫމާތު ސާފުކުރުމުގެ ބައްދަލުވުމުގައި ބައިވެރިވުމަށް މައުލޫމާތު ފޮނުވަން ޖެހޭނެ ކަމަށާއި، ބީލަން ފޮތް ގަތުމަށް ހުށަހަޅަން ޖެހިވަޑައިގަންނަވައި އެޕްލިކޭޝަން ފޯމް އެ ވުޒާރާގެ ވެބްސައިޓުން ލިބެން ހުންނާނެ ކަމަށް ވަނީ ބަޔާންކޮށްފައެވެ.
ކެލާ ފަޅުގައި 2 ރިސޯޓު ތަރައްޤީ ކުރެއްވުމަކީ، ރައީސް ޑރ. މުޢިއްޒުގެ ރިޔާސީ ވަޢުދުފުޅެވެ.
