ކެލާ ޔޫތު ފޯރަމް ސްޕޯރޓްސް އެކެޑަމީގެ ހޭންޑް ބޯޅަ މުބާރާތް – އިއްޔެގެ 2 މެޗް ވެސް ރަންކޮކާލަށް
9 ޖުލައިން ފެށިގެން ކުރިޔަށްދާ ކެލާ ޔޫތު ފޯރަމް ސްޕޯރޓްސް އެކަޑަމީގެ ހޭންޑް ބޯޅަ މުބާރާތުގައި އިއްޔެ (11 ޖުލައި 2024) ހަވީރު ކުޅެވުނު ދެ މެޗު ވެސް ޓީމު ރަންކޮކާ ކާމިޔާބުކޮށްފިއެވެ. ކެލާ ޔޫތު ފޯރަމްގެ ހޭންޑް ބޯޅަ ކޯޓުގައި ކުރިޔަށްދާ މި މުބާރާތުގައި ސީނިޔަރ ބައިގައި އިއްޔެ ކުޅެވުނު މެޗު ރަންކޮކާ ޓީމު ކާމިޔާބުކުރީ 10 ލަނޑު 5 ލަނޑުން ކަނބުލޮ ޓީމާ ބައްދަލުކޮށެވެ. ޖޫނިޔަރ ބައިގައި ވާދަކުރި ރަންކޮކާ ޓީމު މެޗު ކާމިޔާބުކުރީ 7 ލަނޑު 4 ލަނޑުން ކަނބުލޮ ޓީމާ ބައްދަލުކޮށެވެ.
ކެލާ އަންހެނުންގެ ތަރައްޤީއަށް މަސައްކަތްކުރާ ކޮމެޓީގެ ރައީސާ ޙައްވާ ފަޒްނާ ޝަރަފުވެރިކޮށްދެއްވި މެޗުތަކުގެ ކުއީން އޮފް ދަ މެޗުގެ ގޮތުގައި ހޮވުނީ ސީނިޔަރ މެޗުން ރަންކޮކާ ޓީމުގެ ޝައުން ސިމާދެވެ. ޖޫނިޔަރ މެޗުގެ ކުއީން އޮފް ދަ މެޗަކީ ރަންކޮކާ ޓީމުގެ އެލީނާ ޝަރީފެވެ. ކުއީން އޮފް ދަ މެޗަށް ހޮވުނު ކުޅުންތެރިންނަށް އިނާމާއި ސެޓްފިކެޓް ޙަވާލުކޮށްދެެއްވީ މެޗުގެ ޝަރަފުވެރި މެހުމާނު އަންހެނުންގެ ތަރައްޤީއަށް މަސައްކަތްކުރާ ކޮމެޓީގެ ރައީސާއެވެ.
މި މުބާރާތުގެ ފައިނަލް މެޗުތައް މިޔަދު ހަވީރު ކުޅެވޭނެއެވެ. ސީނިޔަރ ފައިނަލުގައި ވާދަކުރަނީ ރަންކޮކާ އަދި ކަމަނައެވެ. ޖޫނިޔަރ ފައިނަލް މެޗުގައި ބައްދަލުކުރަނީ ރަންކޮކާ ޓީމާއި ކަނބުލޮ ޓީމެވެ.
ކެލާ ޔޫތު ފޯރަމް ސްޕޯރޓްސް އެކަޑަމީއަކީ ކުޅުންތެރިން ބިނާކުރުމުގެ މަޤުޞަދުގައި ކެލާ ޔޫތު ފޯރަމުން 2017 ވަނަ އަހަރު، ސްޕޯރޓްސް ކޮމިޝަންގައި ރަޖިސްޓްރީކޮށްގެން ހިންގަމުން އަންނަ އެކަޑަމީއެކެވެ.
