ކެލާ ޔޫތު ފޯރަމް ސްޕޯރޓްސް އެކެޑަމީގެ ހޭންޑް ބޯޅަ މުބާރާތުގައި އިއްޔެ ކުޅެވުނު މެޗްތައް ކަމަނަ އަދި ކަނބުލޮ ކާމިޔާބުކޮށްފި
9 ޖުލައިން ފެށިގެން ކުރިޔަށްދާ ކެލާ ޔޫތު ފޯރަމް ސްޕޯރޓްސް އެކަޑަމީގެ ހޭންޑް ބޯޅަ މުބާރާތުގައި އިއްޔެ ހަވީރު ކުޅެވުނު މެޗްތައް ކަމަނަ އަދި ކަނބުލޮ ކާމިޔާބުކޮށްފިއެވެ. ކެލާ ޔޫތު ފޯރަމްގެ ހޭންޑް ބޯޅަ ކޯޓުގައި ކުރިޔަށްދާ މި މުބާރާތުގައި ސީނިޔަރ ބައިގައި އިއްޔެ ކުޅެވުނު މެޗު ކަމަނަ ޓީމު ކާމިޔާބުކުރީ ކަނބުލޮ ޓީމާ ބައްދަލުކޮށެވެ. ޖޫނިޔަރ ބައިގައި ވާދަކުރި ކަނބުލޮ ޓީމު މެޗު ކާމިޔާބުކުރީ ކަމަނަ ޓީމާ ބައްދަލުކޮށެވެ.
ކެލާ ޞިއްޙީ މަރުކަޒުގެ ފެމެލީ ހެލްތު އޮފިސަރ ސާދާ ޢަބްދުލްޢަޒީޒު ޝަރަފުވެރިކޮށްދެއްވި މެޗުތަކުގެ ކުއީން އޮފް ދަ މެޗުގެ ގޮތުގައި ހޮވުނީ ސީނިޔަރ މެޗުން ކަމަނަ ޓީމުގެ އިސްރާއެވެ. ޖޫނިޔަރ މެޗުގެ ކުއީން އޮފް ދަ މެޗަކީ ކަނބުލޮ ޓީމުގެ މީޝާ ސާހެވެ. ކުއީން އޮފް ދަ މެޗަށް ހޮވުނު ކުޅުންތެރިންނަށް އިނާމާއި ސެޓްފިކެޓް ހަވާލުކޮށްދެެއްވީ މެޗުގެ ޝަރަފުވެރި މެހުމާނެވެ.
މި މުބާރާތުގެ ދެ މެޗު މިޔަދު ހަވީރު ވެސް ކުޅެވޭނެއެވެ. އެ މެޗުތަކުގައި ބައްދަލުކުރާނީ ސީނިޔަރ އަދި ޖޫނިޔަރގެ ކަނބުލޮ އަދި ރަންކޮކާ ޓީމެވެ.
ކެލާ ޔޫތު ފޯރަމް ސްޕޯރޓްސް އެކަޑަމީއަކީ ކުޅުންތެރިން ބިނާކުރުމުގެ މަޤުޞަދުގައި ކެލާ ޔޫތު ފޯރަމުން 2017 ވަނަ އަހަރު، ސްޕޯރޓްސް ކޮމިޝަންގައި ރަޖިސްޓްރީކޮށްގެން ހިންގަމުން އަންނަ އެކަޑަމީއެކެވެ.
