ކެލާ ދާއިރާގެ ޒުވާނުންނަށް އުފާވެރި ޚަބަރެއް އެމްޕީ ދެއްވައިފިއެވެ. އެމްޕީ ޢަބްދުﷲ ޝަރީފު ސޮއިކުރައްވާ އާންމުކުރެއްވި މި އުފާވެރި ޚަބަރުގައި ފްޓްސަލް އަދި ހޭންޑް ބޯލް މުބާރާތެއް ދާއިރާގެ ޒުވާނުންނަށް ޚާޢްޞަކޮށްގެން މި އަހަރުން ފެށިގެން ކުރިއަށް ގެންދާ ގޮތަށް ނިންމެވި ވާހަކަ ހާމަކުރައްވާފައި ވެއެވެ.
އެމްޕީ ޝަރީފު އާންމުކުރެއްވި މި ބަޔާނުގައި ފިއްލަދޫގައި ބާއްވާ މުބާރާތް މި އަހަރުގެ ޖުލައި 27 ގައި ފަށާނެ ވާހަކައާއި، މުބާރާތުގެ ޗެމްޕިއަން ޓީމަށް 25000 (ފަންސަވީސް ހާސް ރުފިޔާ) އާއި، ރަނަރއަޕް ޓީމަށް 15000 (ފަނަރަ ހާސް ރުފިޔާ) ގެ ފައިސާ އިނާމު ދެއްވާނެ ވާހަކަ ވެސް ބަޔާންކޮށްފައި ވެއެވެ.
އެމްޕީ ކަޕްގެ ނަމުގައި ބާއްވާ، މި މުބާރާތް ކުރިއަށް ގެންދަނީ ކުޅިވަރުގެ ހުނަރުވެރިކަން ޒުވާނުންގެ ކިބާގައި އިތުރަށް ތަރައްޤީކޮށް، ކުޅިވަރުގެ މައިދާނުގައި ދާއިރާގެ ރަށްތައް މިހާރަށް ވުރެ ބޮޑަށް ވިދާލާނެ ގޮތްތައް ފަހިކޮށްދިނުމުގެ މާތް މަޤްޞަދުގައެވެ. އަދި ދުންފަތުގެ އިސްތިޢުމާލުކުރުން ފަދަ ނޭދެވޭ ޢަމަލުތަކުން ދުރުވެ، ކުޅިވަރުގެ ތެރެއިން ޒުވާނުންގެ ދުޅަހެޔޮކަމާއި އަޚްލާޤަށް ހެޔޮ ބަދަލުތަކެއް ގެނައުމަކީ ވެސް މި މުބާރާތް ބޭއްވުމުގެ މުހިންމު މަޤްޞަދެކެވެ.
އެމްޕީގެ އުފަން ރަށުގައި ބޭއްވުމަށް އިޢުލާންކޮށްފައިވާ މި މުބާރާތްތައް، ދާއިރާގައި ހިމެނޭ ކެލާ އަދި ވަށަފަރުގައި ވެސް ވަކިވަކިން ކުރިއަށް ގެންދާ ގޮތަށް ޕްލޭންކޮށްފައިވާ ކަމަށް، އެމްޕީއާ ޙަވާލާދެއްވާ ފިއްލަދޫ ސްޓީރިންގ ކޮމިޓީގެ ރައީސް ޠާހާ ޖަމީލު ވިދާޅުވިއެވެ.
