ކެލާ ޔޫތު ފޯރަމްގެ ސްޕޯރޓްސް އެކެޑަމީގެ ފުރަތަމަ ހޭންޑް ބޯޅަ މުބާރާތް އިއްޔެ ހަވީރު ފެށިއްޖެއެވެ. ޔޫތު ފޯރަމްގެ ހޭންޑް ބޯޅަ ކޯޓުގައި ކުރިޔަށްދާ މި މުބާރާތުގެ ފުރަތަމަ ދެ މެޗް އިއްޔެ ހަވީރު ވަނީ ކުޅެވިފައެވެ.
އިއްޔެެއިން ފެށިގެން މި މަހުގެ 12 ވަނަ ދުވަހުގެ ނިޔަލަށް ކުރިޔަށްދާ މި މުބާރާތުގައި އިއްޔެ ހަވީރު ކުޅެވުނު މެޗުތައް ޝަރަފުވެރިކޮށްދެއްވީ ކެލާ ކައުންސިލުގެ މެންބަރު މަރިޔަމް ރިޝްވާއެވެ.
މުބާރާތުގެ ފުރަތަމަ މެޗުގައި ބައްދަލުކުރީ ސީނިޔަރ ބައިގައި ވާދަކުރާ، ކަމަނަ ޓީމާއި ރަންކޮކާ ޓީމެވެ. މި މެޗު ކާމިޔާބުކުރީ ކަމަނަ ޓީމެވެ. ދެ ވަނަ މެޗުގައި ބައްދަލުކުރީ ޖޫނިޔަރ ބައިގައި ވާދަކުރާ ކަމަނަ ޓީމާއި ރަންކޮކާ ޓީމެވެ. މި މެޗު ކާމިޔާބުކުރީ ރަންކޮކާ ޓީމެވެ.
ސީނިޔަރ އަދި ޖޫނިޔަރއިން ކުރެ ކޮންމެ ބައެއްގައި 3 ޓީމު ވާދަކުރާ މި މުބާރާތުގައި މިޔަދު ހަވީރު ވެސް ދެ މެޗު ކުޅުމަށް ވަނީ ހަމަޖެހިފައެވެ. ހަވީރު ކުޅެވޭ މެޗުތަކުގައި ވާދަކުރަނީ ކަމަނަ ޓީމާއި ކަނބުލޮ ޓީމެވެ.
ކެލާ ޔޫތު ފޯރަމަކީ ކެލާ ތަރައްޤީގައި މުހިންމު ދައުރެއް އަދާކުރަމުން އަންނަ ޖަމްޢިއްޔާއެކެވެ. ޔޫތު ފޯރަމްގެ ސްޕޯރޓްސް އެކެޑަމީން އަންނަނީ ހުނަރުވެރި ކުޅިވަރު ކުޅުންތެރިން އުފެއްދާ ކުޅިވަރަށް ލޯބިކުރާ އަދި ޝައުޤުވެރިވާ ޖީލެއް ބިނާކުރުމަށް ގިނަގުނަ މަސައްކަތްތަކެއް ކުރައްވަމުންނެވެ.
