އަޙްމަދު ވަޙީދު ޢަލީ ވެހި ހއ. ކެލާ
ބަސް ކުރިއަރައިގެން ދާނެހާ މަގުތައް އެކީ އަލިކޮށްލަމާ
ލަސްފަސް ނުޖެހި އާޖޯޝުގައި ބަސް ދިރުވުމަށް ހިތްވަރުލަމާ
ފައްކާ އިހުގެ މީހުން ގެނައި ހަދިޔާއަކަށް ބަހަކީ ބަލައި
ރައްކާކުރަން އަބަދަށް ޓަކައި ބަސް ދިރުވުމަށް ހިތްވަރުލަމާ
ނޭނގޭ ލަފުޒު ހޯދާ ބަލައި ދަސްކޮށް އެއިން ބޭނުންހިފައި
ނޭނގޭ ކަތުންނަށް ފޯރުކޮށް ބަސް ދިރުވުމަށް ހިތްވަރުލަމާ
ބަންޖާ ކަލާ ޅެން ރައިވަރާ ލަވަ ފަރިހި އަންބާތައް ނަޔާ
ފަންނާނުނާ އެންމެންވެގެން ބަސްދިރުވުމަށް ހިތްވަރުލަމާ
ލޯބިން ބަހަށް ފެންދީހަދާ މުޑުވައް ބަހުގެ ކުރަމުން ބަހައި
ލޯބިން ކުރާ ކަމަކަށް ހަދައި ބަސް ދިރުވުމަށް ހިތްވަރުލަމާ
ބަހުގެ ޢިއްޒަތް ބަހުގެ ޤަދަރާ ބަހުގެ ހައިބަތު ބޮޑުވެދާހައި
ބަހުގެ ޢިލްމާ ފަންނު ދަސްކޮށް ބަސް ދިރުވުމަށް ހިތްވަރުލަމާ
އިސްވެދިޔަތާ ކުރިއަރައިގެން ބަސް ދިވެހި އައި ގޮތްތައް ބަލައި
އިސްކަން ބަހަށްދީ ގެންހިނގާ ބަސްް ދިރުވުމަށް ހިތްވަރުލަމާ
