ގޯލްޑަން ފުޓްސަލް ޗެލެންޖު 2025 ގަައި ހއ. އަތޮޅުގެ ގްރޫޕް އޭ ގައި މިރޭ ކުޅޭ މެޗް ކާމިޔާބުކޮށް ބާރަށާއި، ފިއްލަދޫގެ އުންމީދު އާވެ، ކެލާއަށް ސެމީ ފައިނަލް ކަށަވަރު ވާނެއެވެ.
ހއ. އަތޮޅުގެ ގްރޫޕް އޭ ގައި 2 މެޗު ކުޅެ 6 ޕޮއިންޓާ، ފައިދާ 7 ގޯލާއެކު ތާވަލުގެ އެންމެ ކުރީގައި އޮތް ކެލާ، ހޯރަފުއްޓާއެކު މިރޭ ކުޅޭ މެޗު ކާމިޔާބު ކޮށްފި ނަމަ، 9 ޕޮއިންޓާއެކު ސެމީ ފައިނަލް ކަށަވަރު ވާނެއެވެ. މި ރޭގެ މެޗަށް ނުކުންނަ އިރު ވެސް ހޯރަފުށި ވަނީ މުބާރާތުން ކުރިއަށް ދިޔުމުގެ ފުރުޞަތު ބަންދު ވެފައެވެ. ކުޅުނު 3 މެޗުން ހޯރަފުއްޓަށް ލިބިފައި ވަނީ 1 ޕޮއިންޓެވެ.
މި ގްރޫޕްގައި މިރޭ ކުޅޭ ބާރަށާއި، ފިއްލަދޫއަށް ވެސް މި ރޭގެ މެޗު ކާމިޔާބުކޮށް ސެމީގެ ޖާގަ ލިބުމުގެ ފުރުޞަތު އެބަ އޮތެވެ. މި ދެ ޓީމަށް ބަލައި އިރު، ކުޅުނު ދެ މެޗުން ބާރަށަށް ލިބިފައި ވަނީ 3 ޕޮއިންޓެވެ. ފައިދާ ގޯލުގެ ޢަދަދަކީ 0 އެވެ. ފިއްލަދޫއަށް ލިބިފައި ވަނީ ކުޅުނު ދެ މެޗުން 1 ޕޮއިންޓެވެ. ފައިދާ ގޯލުގެ ޢަދަދަކީ މައިނަސް 5 އެވެ. އެހެންނަމަވެސް މިރޭގެ މެޗު ކާމިޔާބުކޮށް ސެމީގެ ޖާގައެއް ހޯދުމުގެ ފުރުޞަތު މި ދެ ޓީމަށް ވެސް އަދި އެބަ އޮތެވެ.
މި ރޭގެ މެޗުތައް ފެށުމަށް ހަމަޖެހިފައި ވަނީ 8.00 ގައެވެ. މެޗުތައް ހިނގަމުން ދަނީ ހުޅުމާލޭ ފޭސް އެކެއްގެ ރެހެންދި ފުޓްސަލް ދަނޑުގައެވެ. މި މެޗުތައް ބައްލަވައިލެއްވުމަށް މި ހަތަރު ރަށުގެ މާލޭ ސަރަޙައްދުގައި ދިރިއުޅުއްވާ ފަރާތްތަކުން ދަނޑަށް ދިޔުމަކީ “ތިލައުތުރު” ނޫހުގެ ވެސް ވަރަށް ބޮޑު އެދުމެކެވެ.
