ގޯލްޑަން ފުޓްސަލް ޗެލެންޖް 2025 ގައި ކެލާ ޓީމުން ކުޅުނު ފުރަތަމަ މެޗް ކާމިޔާބުކޮށްފިއެވެ. ރޭ 8.00 ގައި ހުޅުމާލޭގައި ކުޅުނު މި މެޗް ކެލާ ޓީމުން ކާމިޔާބުކުރީ ހއ. މާރަންދޫ ޓީމާ ބައްދަލުކޮށް 2 ލަނޑު 0 ލަނޑުންނެވެ.
މި އަހަރުގެ މުބާރާތުގައި ހއ. އަތޮޅުގެ ގްރޫޕް ބީ ހިމެނެނީ ހޯރަފުށްޓާއި، މާރަންދޫއާއި، ފިއްލަދޫއާއި، ބާރަށާއި އަދި ކެލާއެވެ. ކެލާއާއި، މާރަންދޫ ބައްދަލުކުރި މެޗް ޝަރަފުވެރިކޮށްދެއްވީ ރައްޔިތުންގެ މަޖިލީހުގެ އިހަވަންދޫ ދާއިރާގެ އެމްޕީ ނަޞީރެވެ.
މި ގްރޫޕްގައި ހިމެނޭ ހޯރަފުއްޓާއި، ބާރަށް ބައްދަލުކުރި މެޗް ވެސް ރޭ 8.00 ގައި ވަނީ ކުޅެފައެވެ. މި މެޗް 4 ލަނޑު 2 ލަނޑުން ކާމިޔާބުކުރީ ބާރަށު ޓީމެވެ. މި މެޗްގެ މޮޅު ކުޅުންތެރިއަކަށް ހޮވުނީ ބާރަށު ޓީމުގެ މުޙައްމަދު މާއިޒެވެ.
ކެލާއާއި، މާރަންދޫ ބައްދަލުކުރި މެޗްގެ މޭން އޮފް ދަ މެޗަކަށް ހޮވުނީ ކެލާ ޓީމުގެ ޖަރޒީ ނަންބަރު 9 އަޙްމަދު ވަޙީދެވެ. ކެލާ ޓިމުން ލަނދުޖެހީ ޤާސިމް އަޠޫފާއި، އަޙްމަދު ވަޙީދެވެ. ތާވަލު ހަމަޖެހިފައިވާ ގޮތުން މި ގުރޫޕްގައި ހިމެނޭ ޓީމްތަކުގެ މެޗެއް ދެން އޮންނާނީ މި މަހުގެ 9 ވަނަ ދުވަހުގެ ރެއެވެ. ފުރަތަމަ މެޗްގައި ބައްދަލުކުރާނީ ފިއްލަދޫއާއި، ހޯރަފުއްޓެވެ. ދެ ވަނަ މެޗްގައި ބައްދަލުކުރާނީ ބާރަށާއި، މާރަންދޫއެވެ. ކެލާގެ ދެ ވަނަ މެޗް އޮންނާނީ މި މަހުގެ 13 ވަނަ ދުވަހުގެ ރެއެވެ. ބައްދަލުކުރާނީ ޓީމް ހޯރަފުއްޓާއެވެ. ރެއެކޭ އެއް ފަދައިން ގިނަ ބަޔަކު ޓީމަށް ސާބަސްދިނުމަށް ޓަކައި ދަނޑަށް ދިޔުމަކީ 6 ވަނަ ކުޅުންތެރިއެއް ޓީމަށް ލިބޭ ކަމެކެވެ.
